Северна Кореја се пофали со тестирањето на „суперголеми ракетни фрлачи“, само неколку часа откако Јужна Кореја го осуди ваквото однесување како „несоодветно“ во време кога светот се соочува со пандемија на коронавирусот.
Вчера Јужна Кореја соопшти дека од Северна биле испалени два проектила со краток дострел, што беше уште едно во низата тестирања месецов.
Северна Кореја генерално ги засилува тестирањата на ракети и ракетни фрлачи во пролет, а актуелната пандемија со Covid-19 се чини не ги помести плановите на изолираната земја.
Досега Северна Кореја нема пријавено случаи на заразени со новиот коронавирус, но светските експерти се сомневаат во тоа.
Вчерашното тестирање на ракетните фрлачи беше изведено од градот Вонсан во источниот дел на земјата. Проектилите летаа 410 километри со максимална висина од околу 50 километри и паднаа во морето, соопшти јужнокорејската војска.
Потоа утрово, официјалниот севернокорејски медиумски сервис KCNA објави дека земјата успешно тестирала „суперголеми ракетни фрлачи“.
Јужна Кореја веќе имаше излезено со јавна осуда.
„Во ситуација кога целиот свет се соочува со потешкотии поради Covid-19, ваквите воени потези од страна на Северна Кореја се крајно несоодветни и повикуваме веднаш да прекинат“, стои во соопштението од силите за безбедност на Јужна Кореја.
Ова беше четврти пат месецов Северна Кореја да лансира ракети – на 2, 9 и 21 март беа изведени претходните тестови.