Македонскиот голгетер во ова време на пандемија покаѓжува голема општествена одговорност, останува дома сам, далеку од децата и сопругата.
Илија Несторовски сними видео порака преку својот клуб Удинезе во која им се обраќа на навивачите на клубот. Но, таа порака важи и за сите в Македонија.
„Овој период го минувам малку загрижен, но сигурен сум дека сите ние заедно сме посилни и на крај ќе ја добиеме оваа тешка битка. Во овој момент ми е тешко тоа што сум далеку од мојата фамилија, многу ми недостасуваат моите деца и мојата сопруга. Се надевам дека сѐ ќе се врати во нормала па и тие ќе се вратат тука дома“.
Иле вели дека преголемото слободно време го минува на најразлични начини во својот дом, а колку што му дозволува амбиентот го користи и за да остане во форма.
„Тренирам секој ден, имам голем двор каде може да се трча, клубот ми даде на користење велосипед и тегови и така одржувам форма. Слободното време дома го минувам со гледање телевизија, слушање музика, зборувам со мојата сопруга и моите деца преку FaceTime, играм Ludo King со другари и соиграчи и така времето минува побрзо. Секој ден сум во контакт со соиграчите преку нашата група на WhatsApp, со некои се слушаме преку FaceTime, се известуваме за сѐ и сите се надеваме дека ќе заврши сево ова и што побрзо ќе се вратиме во соблекувалната“.
Популарниот НестоГол на крајот порачува:
„Сакам да испратам порака до навивачите: Јас останувам дома, останете и вие дома бидејќи доколку сите останеме дома можеме да спасиме животи“, заврши Несторовски.