Петтото продолжение од култната франшиза Lethal Weapon со неповторливото дуо Мел Губсон/Дени Гловер се снима 22 години по последниот филм.
Уште во 2018 година имаше шпекулации за петто продолжение, но дури сега стигна потврдата дека тоа навистина ќе се случи, и тоа од продуцентот Ден Лин.
„Се обидуваме да го снимиме петтото, последно продолжение. Дик Донер се враќа како режисер, а се враќа и оригиналната актерска екипа“, откри Лин.
Франшизата се состои од низа акциони филмови со Мел Гибсон и Дени Гловер во улогите на двајца полицајци од Лос Анџелес. Приказната почнува ноќта на 14 декември во 1987 година со самоубиството на Аманда Хансакер (Џеки Свонсон), ќерката на Мајкл Хансакер (Том Аткинс), стар пријател и поранешен војнички колега на детективот Роџер Мерто (Гловер).
Мерто, ветерански полицаец со 20-годишно искуство, добива нов партнер на неговиот 50-ти роденден. Партнерот е 37-годишниот детектив, наредник Мартин Ригс (Гибсон), чија сопруга загинала во сообраќајна несреќа три години претходно, а понатаму во филмот се дознава дека всушност ја убил платен убиец ангажиран да го убие него.
Како резултат на трагедијата, Ригс почнува да пие, има суицидни нагони и е безобѕирен и насилен во применувањето на полициските методи, а колегите го сметаат за „смртоносно оружје“ (Lethal Weapon).
Мерто не е среќен што добил партнер кој е „на работ“, но меѓу нив ќе се развие необично и уникатно пријателство.
Четвртиот филм Lethal Weapon имаше премиера во 1998 година.