Македонија

Се чекаат резултати за 14 лекари од Козле кои биле во контакт со заболено лице од коронавирус

26. март 2020 - 16:49 | Кајгана/МИА

Покрај новите 24 случаи регистрирани до 12 часот, министерот за здравство Венко Филипче информираше и за двајца излечени пациенти, со што сега има три излечени лица од COVID-19.

Едниот е маж од Дебар кој е веќе испишан од Инфективната клиника и е испратен на домашно лекување откако во два наврати неговиот тест бил негативен.

Втората излекувана пациентка е жена од Скопје, која исто така имала два негативни теста. Документите за неа се спремаат и во текот на денот и таа ќе биде пуштена од Инфективната клиника.

Уште еден нов пациент, дел од персоналот на Клиниката за дерматологија во Скопје, е позитивен на коронавирусот. Бројот на заболени се искачи на шест лица вработени на Кожната клиника.

Во текот на идната недела според скринингот во одредени градови ќе се тестираат пошироки групи на лица кои патувале во земји во кои има ризик или биле во контакт со заболено лице.

Од новите 24 случаи, 15 лица се од Скопје, четири лица се од Куманово, двајца се од Дебар и по едно лице од Штип и Тетово.

Вкупната бројка на заразени во земјава со денешните статистики достигна 201 заболен.

Во добра здравствена состојба е и четиригодишното девојче во Штип.

Се чекаат резултатите за 14 лекари од болницата во Козле кои биле во контакт со заболениот пациент од Тетово. Пациентот престојувал две недели во Заводот во Козле, но бил неподвижен и имал само една посета. По, испуштањето од болницата бил тестиран и упатен на Инфективната клиника.

Тестирани се 14 здравствени работници и четворица пациенти, сите се без симптоми, одговори Филипче на новинарско прашање. Се вршат и тестирања на членовите од семејството на пациентот, за да се открие како се заразил со вирусот.