Саудискиот принц Мохамед бин Салман тврди дека убиениот новинар Џамал Кашоги бил опасен исламист. Во телефонски разговор со зетот на американскиот претседател Доналд Трамп, Џеред Кушнер, и со советникот за национална безбедност Џон Болтон, тој рекол дека Кашоги бил член на Муслиманското братство.
Овој разговор се случил на 9 октомври, седум дена откако исчезна новинарот, објави Washington Post. Саудиска Арабија ги негира пишувањата на Washington Post и на New York Times за овие разговори.
Принцот наводно се јавил во Белата куќа за да го одржи американско-саудискиот сојуз во тие тензични денови. Семејството на Кашоги негира дека тој бил член на Муслиманското братство, а и самиот Кашоги го негираше тоа додека беше жив.
„Џамал Кашоги не беше опасен човек на ниту еден начин. Да се тврди спротивното е чиста лудост“, стои во соопштението од семејството.
Уште не постои консензус за тоа како бил убиен саудискиот новинар. Тој влезе во саудискиот конзулат во Истанбул на 2 октомври за да извади документи за брак со свршеницата Хатиџе Џенгиз од Турција. Никогаш не излезе од таму. Турција вели дека веднаш бил задавен и дека телото му било исечено на парчиња. Турските медиуми претходно објавуваа дека Кашоги бил испрашуван и измачуван во конзулатот.
Саудиска Арабија ја смени изјавата во врска со тоа што се случило со Кашоги. Кога исчезна, тврдеше дека излегол од зградата жив и здрав. Подоцна призна дека бил убиен и дека зад тоа стојат одметнати припадници на тајната безбедносна служба. Во Саудиска Арабија се уапсени 18 лица кои се изведени пред судските органи, но Турција бара да ѝ бидат испорачани и да им се суди таму.
Кашоги работеше за американски медиуми и беше отворен критичар на саудиските власти и на принцот Мохамед. Неговото тело уште не е најдено, иако беше утврдено дека бил убиен во конзулатот на 2 октомври.
