Јувентус неочекувано загуби на гости кај Лион, а за тренерот Маурицио Сари виновни се играчите кои правеле спротивно од она што ги учел на тренинг.
Секогаш кога Јувентус нема да го постигне посакуваниот резултат оправдувањето на Сари е дека играчите не направиле нешто од неговите замисли. Така е и за синоќешниот пораз од 1:0 во Лион.
„Во првото полувреме топката циркулираше премногу бавно. Вториот дел беше многу подобар, но во Лигата на шампионите не е доволно да се игра само едно полувреме. Не знам зошто не успеав да ги натерам моите играчи да сфатат дека топката мора да циркулира многу побрзо. Сѐ почнува од тоа. На тренингот ден пред натпреварот циркулираше многу подобро“, се правда Сари.
И за неодамнешните порази кај Верона и Наполи вината Сари ја префрли на играчите.
„Ни недостасуваше решителност и агресија при фазите на напад, а истотака ни фалеше и едно петнаесетина минути во одбраната. Имавме таква несреќа да примиме гол токму кога Де Лихт беше надвор повреден. Второто полувреме беше подобро, но реално тоа не е доволно за натпревар од Лигата на шампионите“, продолжува тој, несвесен дека можеби проблемот е кај него.
„Продолжив да им кажувам, а имаше многумнина кои го правеа тоа, дека премногу бавно ја движат топката и поради тоа завршуваа на погрешни позиции. Тоа е спротивно на она што требаше да се случува. Во последно време многу работи правиме наопаку од што ги правиме на тренинг“, заврши Сари.
Останува прашањето како играчите го разбираат на тренинг, а на натпревар 90 минути не разбираат што сака да им каже.