Најголемиот број нови автомобили трошат барем 30 проценти повеќе гориво од декларираната потрошувачка во фабричките спецификации. Тоа го покажуваат тестовите што ги спроведе Emissions Analytics.
Најголемиот кривец за таквата голема разлика при возењето во реални услови е што компаниите смеат да ги прават тестовите во идеални лабораториски услови.
Сепак кога потрошувачката се мери во реални услови на возење, се добиваат бројки кои се и до 45 проценти повисоки. Emissions Analytics тестирале повеќе од 60.000 автомобили, а потрошувачката е мерена со мобилна опрема поставена на возилата кои се движеле во реални услови на сообраќај.
Резултатите покажале дека само два автомобили имаат точни податоци - Aston Martin Vantage и Nissan 370Z ја постигнуваат фабрички декларираната потрошувачка, а понекогаш имаат и подобри резултати.
На тестовите најлошо помина Fiat 500 кој има реална потрошувачка од дури 45% повеќе од таа наведена во спецификациите.
Повеќе од 40 проценти разлика има и кај Ford Fiesta и Ford Focus, Toyota Yaris и MINI, додека и кај некои од популарните дизел автомобили има огромни разлики меѓу реалната и декларираната потрошувачка.
Најмали отстапки имаат Honda Civic (+21%) и Citroen C3 (+28%).
За да се намалат разликите, во Европа од 2017 година ќе се воведе нов начин за мерење на потрошувачката, кој повторно ќе биде лабораториски, само што ќе биде многу попрецизен.
Експертите сметаат дека новите модели би требало да се тестираат во реални услови на возење, на патишта каде што има нагорнини и свиоци, со вклучена клима и со сообраќај, за идните сопственици да добијат реална слика за потрошувачката.