Руската национална телевизија Russia-24 на гледачите им го претстави „најнапредниот човеколик робот кој знае да танцува“, па дури и го изнесе на сцена за да се пофали со неговите способности. Но, набрзина вистината излезе на виделина – наместо робот, тие претставија човек во роботски костум.
„Роботот Boris веќе научи да танцува и воопшто не е лош во тоа“, рече репортерот на Russia-24 кој известуваше од младинскиот форум посветен на роботика и нови технологии.
Блогерите и експертите за технологија веднаш почнаа да се сомневаат во претставената технологија. Рускиот вебсајт TJournal почна да поставува прашања поврзани со перформансите на роботот: Каде се надворешните сензори на Boris? Зошто роботот прави „непотребни движења“ додека танцува? И најважно, зошто роботот е толку крупен како да во него може да собере цел еден возрасен човек?
Само неколку часа откако Борис ѝ беше претставен на публиката, фотографии објавени на социјалните мрежи покажуваа човечки врат како се крие под роботската површина.
Испадна дека Boris е всушност човек облечен во костум наречен „Роботот Аљоша“ направен од компанија која се вика Show Robots. Костумот чини 3.500 долари и е опремен со микрофон и дисплеј, за да креира илузија дека се работи за вистински робот кој е способен да извршува човечки движења и активности.
Фотографија објавена од страна на MBKh Media, новинска агенција основана од Михаил Кодорковски - еден од најжестоките противници на Владимир Путин, покажува актер како го облекува костумот на Boris, непосредно пред форумот одржан во Јарославл.
Организаторите на технолошкиот форум кој се одржува секоја година побрзаа да истакнат дека тие воопшто не се обиделе да го претстават роботот како вистински, но за нивна несреќа, телевизијата Russia-24 го направи токму тоа.
„Би било убаво доколку некој од студентите кои се присутни тука се посвети на роботиката. Посебна мотивација би можел да им биде некој од напредните и модерни роботи кои се претставени денеска на сцената“, рече репортерот на Russia-24.
Видеото во кое може да се види лажниот робот Boris како танцува набрзо беше отстрането од YouTube каналот на телевизијата, но само еден ден подоцна социјалните мрежи го направија своето и го вратија видеото пред очите на јавноста.