Вчерашната победа на Јувентус над Џеноа донесе значаен јубилеј за 35-годишниот Португалец.
Кристијано Роналдо постигна рекорд што го нема остварено ниту еден друг фудбалер во 21. век: 400 победи во петте најдобри лиги во Европа.
Шампионот на Италија, Јувентус, оствари нов триумф во италијанската Серија А на гости кај Џеноа, со резултат 3:1 (0:0). Јувентус на тој начин стигна до 4. позиција со 23 бода и три помалку од Милан, кој има и натпревар помалку. Џеноа остана претпоследна со само шест бода.
Роналдо го забележа 100-тиот настап во дресот на Јувентус и стигна до 79. гол, со 19 асистенции. Тоа значи дека учествуал во 98 голови на „Старата дама“.
Јуве дојде до бодовите со два гола од белата точка во последните 15 минути од играта, а Роналдо беше стрелец и во двата случаја.
Претходно, водството до Јувентус, по многу „слабиот“ прв дел, го донесе Пауло Дибала во 57. минута.
Но, само четири минути подоцна, поранешниот играч на Јувентус, Стефано Стураро израмни. И тогаш Кристијано Роналдо влегува на сцена, како што споменавме, со два гола од белата точка.
Така се изедначи со Златан Ибрахимовиќ на листата на стрелци со 10 погодоци.
