Роботите може да заменат 20 милиони работни места во индустријата ширум светот до 2030 година, со што би се влошила социјалната и географската нееднаквост, но тоа позитивно би влијаело на економскиот раст.
Најтешко ќе бидат погодени работните места со најниски квалификации и тоа на ист начин по земји и внатре во секоја земја, наведува Oxford Economics.
Роботите веќе имаат преземено неколку милиони работни места од луѓето во индустријата и тој тренд напредува и во другите области, благодарение на модерната технологија и вештачката интелигенција, наведува британското аналитичко биро во извештајот во кој се разгледува и економскиот аспект на употребата на роботи.
Многу аналитичари сепак сметаат дека автоматизацијата во поширока смисла повеќе придонесува за создавање, а не за укинување на работни места за луѓето, но дека е создаден поголем јаз меѓу работните места за кои е потребна ниска квалификација и оние за кои треба висока, па така без работа остануваат многу обични работници.
Роботизацијата ќе влијае на зголемување на продуктивноста и на растот на стопанството, сметаат експертите и проценуваат дека светската економија би можело да има профит до 5 илјади милијарди долари до 2030 година.
Тие исто така укажуваат дека најтешко ќе бидат погодени работните места со повторувачки дејности и работните места во центрите за логистика.
Работните места што бараат „сочувство, креативност и рационална интелигенција“ ќе останат во рацете на луѓето уште многу децении, се вели во извештајот и уште се додава дека роботите сепак ќе бидат сѐ поприсутни во трговијата, здравството, угостителството, сообраќајот и земјоделието.