Холивудскиот актер Роберт де Ниро смета дека американските демократи немаа друг избор освен да отворат истрага за импичмент за претседателот Доналд Трамп.
„Ова мораше да се случи“, рече Де Ниро во емисијата „Reliable Sources“ на CNN Business со Брајан Стелтер.
Тој додаде дека актуелната политичка ситуација во земјата е „кризна“ и дека премногу луѓе се превнимателни и благи во врска со тоа.
Два дена претходно, Де Ниро беше на Филмскиот фестивал во Њујорк каде неговиот најнов филм „The Irishman“ имаше премиера и на црвениот тепих за настанот даде изјава за Variety во која рече дека се надева дека ќе има импичмент за Трамп.
Ненси Пелоси, спикер на Претставничкиот дом на САД, минатата недела соопшти дека се отвора официјална истрага за импичмент на Трамп откако „свиркач“ дојави дека претседателот на САД извршил притисок врз лидерот на Украина да отвори истрага за синот на претседателскиот кандидат на демократите Џо Бајден.
Де Ниро е гласен и директен критичар на Трамп и неговите политики во изминативе години. Сепак, легендарниот холивудски актер не е сигурен дека Трамп сам би се повлекол од функцијата.
„Мислам дека не е способен да си даде оставка. Ќе вика дека сѐ е наместено или нешто слично. Денот откако беше избран, реков ајде да му дадеме шанса. Не се знае. Ќе видиме. Ама полош е отколку што некогаш сум можел да замислам“, рече Де Ниро.
Но, коментарите на Де Ниро за Трамп не се баш најдобро прифатени од симпатизерите и поддржувачите на претседателот.
Во неговиот говор лани на доделувањето на наградите Тони, актерот два пати рече „Кој го е*е Трам“, на што присутните реагираа со овации, Fox News со критики.
„Кој ги е*е нив, кој ги е*е“, му одговори Де Ниро на Стелтер за критиките кон него од Fox News, а потоа театрално се извини што пцуеше.
Кога Стелтер го праша зошто користи пцовки за да ја докаже поентата, Де Ниро се оправда велејќи: „Типот е како гангстер“ и „се наоѓаме во ужасна ситуација“.
Тој исто така додаде дека „Fox Newsсе одоговорни што го помагаат Трамп“.
Најновиот филм на Де Ниро, „The Irishman“, во режија на Мартин Скорсезе, ќе има кинопремиера на 1 ноември, а на Netflix ќе биде достапен на 27 ноември.