Навивачите за момент паднаа во еуфорија, но набрзо стигна големо разочарување.
Кралскиот клуб објави видео во кое во центарот на „Сантјаго Бернабеу“ се поставени маса и стол за презентација. На масата седи непознато лице, кое го отвора календарот на лаптопот и пишува нешто во него. Видеото завршува со црн екран и натпис: „02.02.2024“.
Секако, веднаш дојде до еуфорија на социјалните мрежи. Всушност, сите мислеа дека Флорентио Перес го довел Килјан Мбапе за да го направи Реал повторно мега тим. Сепак, за да избегне какви било шпекулации, Реал објасни за што се работи.
„Ништо од Мбапе. Реал на 2 февруари ќе објави нова голема соработка со еден спонзор, HP. Познатата компанија ќе го има своето лого на ракавите на дресот на Реал, кој станува најскап во светот“, објави Marca.
Реал добива 120 милиони евра годишно од Adidas, а уште 70 милиони плаќа Emirates, кој е главен спонзор на дресот. HP наводно ќе плаќа околу 10 милиони евра годишно за своето лого на дресот. Реал на тој начин ќе заработува околу 200 милиони евра по сезона од сите спонзорски договори поврзани со дресот, во кои не е вклучена заработката од продажбата на дресови.
