Најдобриот стрелец на Русија на ова Светско првенство, Денис Черишев, е вмешан во допинг скандал.
Русија е вистинска сензација на ова Светско првенство. Домаќините се изборија за пласман помеѓу осумте најдобри селекции, а токму Черишев, кој во првите два натпревари во групата постигна три гола, е еден од најзаслужните за овој подвиг.
Во осмина финалето против Шпанија, Черишев влезе во вториот дел и потоа погоди во пенал серијата за неочекуван пласман на Русија во четвртфинале.
Левото крило на Виљареал, заедно со Артем Џуба (исто така стрелец на три гола), како и Александар Головин се најзаслужните играчи за неверојатниот пласман на Русија во четвртфиналето, каде во сабота ги чека Хрватска.
Но, Черишев сосема неочекувано се најде во допинг скандал и тоа благодарение на неговиот татко, кој за новинарите на рускиот портал „Sport Weekend“, изјави дека неговиот син земал инјекции со хормон за раст.
За истражувачите од Руската анти-допинг агенција (РУСАДА), тоа беше повеќе од доволна причина да се отвори истрага.
За почеток ќе ги испитаат сите кои учествуваа во лекувањето на повредата на мускул, која Черишев минатата година го оддалечи од терените повеќе од шест месеци.
Користењето на хормон за раст без почитување на пропишаната процедура се смета за земање на допинг и се казнува со суспензија до 4 години.
Сега Русинот се најде во непријатна ситуација и мораше да го демантира својот татко, а Рускиот фудбалски сојуз објави дека играчот примил инјекција со легална состојка, која помага за побрзо заздравување на раните.
Сојузот ги обвини новинарите дека погрешно ги протолкувале зборовите на неговиот татко, а додаваат и дека снимката од интервјуто тоа го потврдува.
Како и да е, РУСАДА веќе ја отвори истрагата, а ситуацијата со Черишев е нов проблем за Русија после повредата на Жирков пред натпреварот со Хрватска.
