Регион

Потврден првиот случај на корона вирус во Грција, жената патувала во Италија

26. февруари 2020 - 12:42 | МИА

Атина, 26 февруари 2020 (МИА) – Позитивни се резултатите на корона вирус од примерокот на 38-годишна жена во Солун, со што е и потврден првиот случај на Covid-19 во Грција.

Жената која неодамна патувала во Италија е во добра здравствена состојба, како што соопшти портпаролот на грчкото Министерство за здравство и научен соработник во грчката Национална организација за јавно здравје, професорот Сотирис Циодрас.

-Потврден е првиот случај на вирусот во Грција. Станува збор за Гркинка, на 38-годишна возраст, која патувала во регион во северна Италија. Во добра здравствена состојба е, ја следи тим од одлични колеги во Солун. Во овој момент, се проверуваат нејзините контакти и нејзините блиски контакти, доброволно ќе бидат ставени во изолација и ќе се следи нивната здравствена состојба, рече Циодрас.