Скопје, 24 септември 2018 (MIA) - Основното јавно обвинителство за гонење на организиран криминал и корупција до скопскиот Кривичен суд поднесе обвинителен акт против поранешниот директор на владината Служба за општи и заеднички работи, Васе Доневски, и уште едно лице, поради кривично дело злоупотреба на службена положба и овластување.
- Во периодот од јуни до август 2015 година, првоосомничениот како директор на владина служба потпомогнат од второосомничениот – како сопственик на правно лице, свесно и со умисла, ги пречекориле границите на своето службено овластување со намера да прибават значителна имотна корист за сопственикот на правното лице и за правното лице. Осомничените договориле спроведување на постапка за јавна набавка во која предмет на јавната набавка било одржување на хигиена, тековно одржување, дактилографски услуги, противпожарна заштита и оперирање со телефонски централи, се наведува во соопштението од Јавното обвинителство.
Оттаму посочуваат дека осомничените постапувајќи спротивно на Законот за јавни набавки, имале за цел да ја избегнат должноста за претходна согласност од Советот за јавни набавки.
- Во текот на постапката постапиле спротивно и на член 43 став 1 од Законот за јавни набавки кој предвидува дека учесниците во подготвување на тендерската документација не смеат да бидат понудувачи или членови на група на понудувачи во постапката за доделување на договор за јавна набавка. Првоосомничениот и покрај направените пропусти не постапил согласно член 169 од Законот за јавни набавки и не ја поништил постапката. Тој злоупотребувајќи ја службената должност со преземенетите дејствија го фаворизирал правното лице на второосомничениот, овозможувајќи само една понуда во тендерската постапка, со што била оневозможена аукција за постигнување негативно наддавање за пониска цена, а на штета на Буџетот на РМ во износ од 660.834.855 денари, се наведува во соопштението.
Надлежниот јавен обвинител до Основниот суд Скопје 1 Скопје доставил и предлог за продолжување на мерката куќен притвор за првоосомничениот. За второосомничениот, кој моментално е недостапен за органите на прогонот и по кого е распишана меѓународна потерница, со решение е определена мерка притвор сметано од денот на неговото пронаоѓање и лишување од слобода.
Доневски беше приведен на 15 март по истрагата што ја отвори Управата за финансиска полиција, а осомничен е и поранешниот управител на компанијата Секјуриком.
