Предводникот на Манчестер Сити има секаква причина да е задоволен од вчерашниот исход на првиот осминафиналкен дуел со големиот Реал.
Манчестер Сити успеа да слави на гости кај Реал Мадрид и покрај тоа што губеше 1:0 на само половина час до крајот на натпреварот.
„Да се победи на „Бернабеу“ е голема сатисфакција. Не сме навикнати на вакви резултати, па затоа ова ни кажува дека можеме да отидеме на било кој стадион и да победиме“, рече тренерот Пеп Гуардиола по натпреварот.
„Би рекол дека одигравме најдобро што можевме. Примивме гол кога не требаше да примиме, а кога тие беа подобри успеавме да постигнеме. Но, тоа е натпреварување, тоа е фудбал“.
Победничкиот гол беше дело на белгискиот виртуоз Кевин Де Брујне и тоа од белата точка. Белгиецот досега не изведуваше пенали сезонава, но синоќа доби шанса и ја искористи. Дојде неговиот ред откако „Граѓаните“ ги промашија последните четири пенали во Премиер лигата кои ги изведоа Серхио Агуеро, Илкај Ѓундоан, Габриел Жезус и Рахим Стерлинг.
„Кевин вежбаше пенали покажувајќи карактер и посветеност и затоа му велам „благодарам“, но не само на Кевин туку на сите изведувачи без разлика дали погодиле или не оваа сезона. За изведување пенал потребна е храброст. Доброто за нас е што реализиравме пенал на ваква ноќ“, вели стратегот на Сити.
„Цел натпревар создававме шанси. Куртоа бранеше навистина добро. Но, според моето искуство во Лигата на шампиони, не можеш 90 минути да контролираш натпревар на вакво ниво. Добро му одбранивме на Бензема кога беше клучно и создадовме навистина добри шанси кои повеќето тимови не ги прават на овој стадион“, заврши задоволниот Пеп.
