Капитенот на македонската фудбалска репрезентација со нова донација, овој пат во својата родна Струмица.
Горан Пандев никогаш не сакал публицитет, дури и кога се работи за негова хуманитарна донација. Откако заедно со останатите репрезентативци донираа парични средства за справување со епидемијата во државава, потоа самостојно помагаше на загрозени семејства во родната Струмица, сега ја помогна и тамошната болница.
И тоа ќе останеше незабележано доколку донацијата некако не излезеше во јавност, благодарение на еден регионален портал. Слушнале муабети за наводна донација, па се обратиле до директорот на болницата, д-р Наќе Гогов.
„Точно дека деновиве донираше и Горан Пандев. Неблагодарно е да споменувам износи, но би сакал да упатам благодарност како до него така и до останатите правни и физички лица. Парите ќе бидат искористени за набавка на скафандери, заштитни маски, ракавици според стандардите на СЗО за да бидат заштитени здравствените работници кои се на првата борбена линија и најмногу се изложени на ризикот да бидат заразени. Тоа се лица кои треба да спасат нечиј човечки живот и затоа треба да бидат соодветно заштитени“, изјави директорот на струмичкта болница Наќе Гогов за порталот Дрнка.мк.
Пандев моментално се наоѓа во домашна изолација во Џенова и е пример за почитување на мерките издадени од здравствените власти.
