Штип, 30 март 2020 (МИА) – Еден пациент кој е позитивен на коронавирус е сместен на Инфективното одделение во штипската Клиничка болница.
Директорот на болницата, Ален Ѓеорѓијев, вели дека станува збор за маж кој неколку дена е хоспитализиран бидејќи бил со покачена телесна температура и кашлица. Во текот на вчерашниот ден неговите резултатите се пристигнати и е потврдено дека е позитивен на коронавирусот. Тој е првиот пациент со Covid-19 кој се лекува на Инфективното одделение.
Овој пациент кој е со средна клиничка слика го формира новиот, трет кластер. Според епидемиолошката анкета ова лице нема поврзаност ниту со првиот, ниту со вториот кластер во Штип. Посочил и дека нема излегувано надвор од државата.
Бројката на позитивни со коронавирус во Штип од вчера е вкупно 14, од кои десет лица се од првиот кластер, кој е поврзан со првиот и најмладиот пациент во Штип, четиригодишното девојче кое пристигна од Англија, вториот кластер се повозрасните сопружници и нивниот внук, кои беа на скијање во Копаоник и третиот кластер е мажот кој е сместен на Инфективното одделение.
