Спојувањето на Deutsche Bank и нејзиниот ривал Commerzbank долгорочно би резултирало со укинување на дури 30.000 работни места.
Тоа го изјави претставникот на германскиот синдикат Верди и член на надзорниот одбор на Deutsche Bank, Јан Душек.
Најголемиот дел од тие 30.000 загрозени позиции се во Германија, рече Душек, пренесува Reuters. Краткорочно гледано, на повидок се околу 10.000 откази, додаде тој.
„Според нашите сознанија, потенцијалното спојување не би резултирало со бизнис модел што ќе биде одржлив на долг рок“, предупредува Душек.
Жестокото противење на синдикатот на најавеното спојување на двете најголеми германски банки следеше откако и двата гиганти вчера потврдија дека се во преговори за спојување.
Вредноста на акциите на Deutsche Bank утрово скокна за 3,4 отсто, а на Commerzbank за 4%.
Надзорните одбори на двете банки треба да одржат состанок во четврток за да се дискутира спојувањето, објави Reuters.
Во двете банки моментално се вработени околу 140.000 луѓе ширум светот. Deutsche Bank има 91.700 вработени, а нејзиниот ривал Commerzbank 49.000.