Вечерва во Лос Анџелес нема да се игра кошарка, градското дерби е одложено поради трагичната смрт на Коби Брајант.
Како почит кон НБА легендата ноќва во Лос Анџелес нема да има кошарка. Коби Брајант целата своја кариера ја мина играјќи токму во овој град, бранејќи ги боите на Лејкерс.
Во 4 часот ноќта помеѓу вторник и среда требаше да се игра еден од најинтересните натпревари сезонава, дербито на Лос Анџелес и дерби на Западот помеѓу првиот и вториот на табелата. Но, дерби нема да има, градот ја оплакува прераната смрт на Коби Брајант, па НБА одлучи да го одложи натпреварот.
„НБА реши да го одложи натпреварот во знак на почит кон Лејкерс кои се најпогодени од трагичната смрт на нивната легенда Коби Брајант, на неговата ќерка Џана и на 7 други луѓе загинати во хеликоптерската несреќа во неделата“, стои во официјалното соопштение на Асоцијацијата. Не се наведува за кога е одложено дербито.
Во „Стејплс Сентр“ во моментов не е ни можно да се игра кошарка. Градот е во шок, а домот на Лејкерс и Клиперс од неделата е место на кое илјадници луѓе секојдневно доаѓаат да му оддадат почит на еден од најголемите кошаркари на сите времиња.
Играчите на Лејкерс во неделата се вратија од Филаделфија и досега не одржаа ниту еден тренинг, седат во болна тишина шокирани од трагедијата.
