Министерството за здравство објави нов извештај за состојбата со коронавирусот во земјава.
Пријавени се вкупно 18 нови случаи на COVID-19 од 4 градови. Најголем број од пријавените лица се со место на живеење во Скопје, 11 лица од кои 4 во Кисела Вода, 2 во Гази Баба, 2 во Центар, и по едно лице во Ѓорче Петров, Сопиште и Илинден.
По Скопје следуваат Прилеп со 4 заболени лица, Куманово со 2 нови случаи и Тетово со 1 регистриран случај.
Хоспитализирани се 4 лица, а останатите се на домашно лекување.Најголем дел од регистрираните случаи се на возраст од 30-39 години (n=7), а во однос на дистрибуцијата по пол, по 9 се машки и женски.
Вкупно 11 лица имале контакт со веќе потврден случај на COVID-19 во државата.
Тестирани се вкупно 369 материјали во лабораторијата за вирусологија и молекуларна дијагностика при ИЈЗ и во приватните лаборатории. Позитивни се 18 или 4,9% од тестираните.
Заклучно со 26.03.2020, пријавени се вкупно 219 случаи на COVID-19 (I=10,6/100.000).
Според место на постојано живеење, случаи на COVID-19 се регистрирани во 10 градови: Скопје (n=134), Дебар (n=43), Куманово (n=17), Штип (n=8), Прилеп (n=6), Велес (n=3), Охрид (n=3), Кавадарци (n=2), Тетово (n=2) и Гостивар (n=1) (Картограм 1).
Највисока кумулативна инциденца на 100.000 жители се регистрира во Дебар со 154,9 заболени на 100.000 жители, а во Скопје инциденцата е 21,7 на 100.00 жители, додека во Штип инциденцата на 100.000 жители е 15,2.
На ниво на општина на територијата на Скопје пријавени се заболени лица во 10 општини, а најголем број на заболени се регистрирани во Карпош, вкупно 27 лица.
Во Гази Баба, Кисела Вода и во Центар има по 20 заболени лица, 11 лица се од други градови, а живеат во Скопје, во Ѓорче Петров има 11 лица, Аеродром 8, Сопиште 7, Бутел 4, Чаир 3 и Илинден 2 лица.
Во Скопје се болни 132 лица, а двајца се оздравени.
Во однос на дистрибуцијата по пол, регистрирани се 109 машки и 110 женски лица.
Возраста на заболените се движи од 2 до 91 години (медијана – 44 години). Најголем број на заболени се на возраст од 30-39 години – 51 (23,3%) и 50-59 години – 50 (22,8%).
Од пријавените случаи, 48 или 21,9% се/биле хоспитализирани во текот на болеста, а 171 случај се на домашно лекување и во домашна изолација, асимптоматски или со полесна клиничка слика. Во однос на симптомите кои се пријавени кај заболените лица, најчесто се регистрирани кашлица (67,1%), температура (64,5%), слабост (30,3%), главоболка (26,3%), болка во грло (21,7%) и треска (20,4%), а 67 лица се без изразени симптоми.
Регистриран е 21 случај на заболување меѓу здравствени работници. Од овој број, 14 се заболени во болнички/ амбулантски услови.
Според исходот од заболувањето, кај 213 лица се активни случаи, три случаи се испишани од болница со излечена болест, а регистрирани се 3 смртни случаи.
Од позитивните случаи, регистрирани се 822 контакти кои се следат или беа следени во период од 14 дена. Од регистрираните, 186 случаи се со локална трансмисија.
Проценката на ризик на СЗО на глобално ниво и на ниво на Европски Регион за понатамошно ширење на COVID-19 кажува дека ризикот е многу висок.
Според категоризацијата на ризикот од СЗО, се проценува дека:
- Дебар е во фаза 4 (широко-распространета трансмисија во заедницата).
- Скопје е во фаза 4 (широко-распространета трансмисија во заедницата).
- Останатиот дел од Република Северна Македонија е во фаза 2 (спорадични случаи).
