Македонија

Нови телефонски линии за психо-социјална поддшка на родителите и децата

26. март 2020 - 12:17 | МИА

Во соработка со Министерството за здравство и во партнерство со Универзитетската клиника за психијатрија, УНИЦЕФ денеска отвори две нови телефонски линии за поддршка на менталното здравје и психо-социјална поддршка на тинејџерите и на нивните родители и на родителите на деца со попреченост погодени од кризата со Covid-19. 

-Телефонската линија 078 378 728 за помош на тинејџерите и на нивните родители и телефонската линија  070 291 574 за помош на родители на деца со попреченост ќе работат од 9:00 до 16:00 часот секој работен денТелефонската линија 072 912 676 за помош на деца на училишна возраст и на родители на деца на предучилишна и училишна возраст ќе работи од 9:00 до 19:00 часот секој работен ден, информираат од Канцеларијата на УНИЦЕФ во Скопје. 

Ова, велат оттаму, е дополнителна поддршка на веќе воспоставената телефонска линија на Универзитетската клиника за психијатрија за родителите на децата од предучилишна и училишна возраст која сега е отворена и за самите деца на училишна возраст.

-Сакаме да ги охрабриме родителите и децата да разговараат за сите прашања и проблеми. Нормално е тие да имаат различни реакции на Covid-19 како што е нормално да се борат да го задржат чувството на нормалност дома, вели Патриција ди Џовани, претставничка на УНИЦЕФ.

Во оваа ситуација, додава таа, децата и тинејџерите може да се чувствуваат тажно, изолирано, па дури и луто.

-Со телефонските линии ќе им се понуди поддршка на родителите околу олеснување на продолжениот стрес и ќе им се помогне на децата и тинејџерите да изградат издржливост за снаоѓање во стресни ситуации, особено сега кога им е сменета секојдневната рутина и мораат да останат дома, потенцираа ди Џовани.

Освен непосредните здравствени проблеми, кризите како пандемијата на Covid-19, според УНИЦЕФ, може да предизвикаат пошироки ефекти врз децата и нивните семејства, како што се вознемиреност и страв од непознатото. Главната цел на новите услуги е да се обезбеди советување и поддршка за да се спречат второстепени ефекти од епидемијата, како што се запоставување на децата, недостаток на родителска грижа и поголема изложеност на насилство во семејството.

 –Освен одговорното постапување за заштита од вирусот, треба да се погрижиме да бидеме безбедни и од второстепените негативни ефекти коишто пандемијата може да ги има врз нашето ментално здравје. Континуираниот стрес и анксиозност може значително да се одразат врз нашиот ум и способност да се одбраниме. Од огромно значење е сериозно да ги сфатиме нашата и благосостојбата и менталното здравје на нашите деца и да побараме поддршка, вели Венко Филипче, министер за здравство.

Професорот Стојан Бајрактаров, директор на Универзитетската клиника за психијатрија, пак, вели дека, актуелната пандемија на вирусот Covid-19 ја зголемува свесноста за грижата за нашето и за здравствето на нашите деца.

-Но, покрај физичкото здравје, во вакви услови е од особена важност да обрнеме внимание и на грижата за менталното здравје,   да ја развиваме отпорноста и поврзаноста во рамките на семејството, да ја искористиме оваа несакана состојба како можност за подобрување на ментална благосостојба пред сѐ на младите, вели тој. 

УНИЦЕФ соработува со стручните лица од Универзитетската клиника за психијатрија со цел да се стават на располагање информативни видеа, сесии со прашања и одговори, и подкасти за да им се помогне на родителите и децата подобро да се справат со анксиозноста и стравот поради Covid-19 и да се фокусираат на својата благосостојба.