Министерот за здравство Венко Филипче информираше дека денешната бројка на новозаразени е драстично намалена, а првпат поголем е бројот на оздравени од заразени.
Во изминатите 24 часа потврдени се 18 нови случаи на COVID-19. Прв случај е регистриран во Пехчево каде позитивен е вработен во брза помош.
По градови:
2 - Скопје
9 - Куманово
2 - Штип
2 - Тетово
1 - Велес
1 - Гостивар
1 - Пехчево
„Со денешните оздравени 21 лице, досега имаме оздравени вкупно 200 пациенти. Од денешните оздравени 16 се од Скопје, 3 од Куманово и 2 од Штип, сите се лекуваа во домашни услови“, напиша Филипче на Facebook.
Со ова вкупната бројка на дијагностицирани пациенти со COVID-19 во нашата земја изнесува 1.225 лица. Во изминатото деноноќие направени се 263 теста.
Починати се тројца пациенти позитивни на COVID-19. На Клиниката за инфективни болести и фебрилни состојби почина една пациентка од Лабуништа на 46-годишна возраст, примена на 29 март, а подолг временски пердиод била на механичка вентилација, како и еден 71-годишен пациент од Прилеп, лекуван на клиниката од 15 април.
Во ГОБ „8 Септември“ почина пациентка од Куманово на 63-годишна возраст, хоспитализирана во тешка состојба на 6 април и веднаш поставена на респираторна машина.