Стил

Новата Мис Германија е најстарата победничка на изборот за убавина

18. февруари 2020 - 13:40 | Б.С.Б.

Од оваа година изборот за Мис Германија оди во чекор со времето. Победничката е одбрана од жири составено исклучиво од жени, а новата Мис е 35-годишна самохрана мајка и воедно најстарата победничка во долгата историја на овој натпревар.

Леони Шарлот фон Хасе кога ја слушна веста на бината застана во победничка поза, со кренати раце, опкружена со 15 натпреварувачки кои исто така се надеваа дека ќе ја освојат круната.

„Ова е ноќ на силни жени“, изјави 35-годишната убавица.

Изборот за Мис Германија се одржува од 1927 година, но од минатиот викенд работите се променија. Организаторот Макс Клемер вели дека барале современа жена со став, присутна на социјалните мрежи, жена која ќе биде пример за другите. Изборот на Мис не се ограничува само на надворешниот изглед. Затоа од оваа година нема повеќе ревии во костими за капење. Жените се претставуваат во вечерни тоалети и секојдневна облека, со високи потпетици, но и со чевли без потпетици.

Новата Мис Германија е одбрана од исклучиво женско жири. Леони е најстарата Мис во 93-годишната историја. Таа е и првата мајка со оваа титула. Има тригодишен син.

„Карактерот доаѓа со животното искуство“, вели Леони.

Родена е и израсната во Намибија, каде живеат нејзините родители и трите сестри. По матурата студирала маркетинг и го има прошетано светот. Живеела во Атина, Лондон, Милано и Берлин. Работела во маркетинг агенции и како стилист.