Во заостанатиот натпревар од 21. коло вечерва Наполи на гостински терен го торпедираше Сасуоло совладувајќи го со 6:1.
Почетокот навестуваше нов неуспех за актуелниот шампион откако Србинот Урош Рачиќ ги доведе домашните во водство по 17 минути игра.
Но, потоа „Партенопеите“ се разбудија и потсетија на оној тим кој жареше и палеше низ Чизмата лани.
Прво Амир Рахмани израмни во 29. минута, а по две минути Виктор Осимхен се погрижи за пресврт. Нигерискиот голгетер на 4 минути пред паузата зголеми на 1:3 откако Матео Политано во вторпат му намести.
Само што почна вториот дел, во 47. минута Осимхен прослави хет-трик. Четири минути подоцна пукна петарда на „Мапеи“ кога во листата на стрелци се запиша и грузискиот бисер, Хвича Кварацхелиа.
Во 75. минута конечните 6:1 ги постави Кварацхелиа со својот втор гол.
И покрај победата, Наполи остана на 9. место на табелата, но сега со 40 бодови, колку шпто има и осмиот Лацио. Сасуоло останува во зоната за испаѓање со 20 бода, колку што имаат и Каљари и Верона.
Вечерва од 20:45 се игра и другит заостанат натпревар од 21. коло, а на „Џузепе Меаца“ лидерот Интер ја пречекува Аталанта. Двата натпревара беа одложени поради настапите на Интер и Наполи во Суперкупот.
