Италијанскиот автомобилски производител Maserati нема намера слепо да ги следи трендовите на целосна електрификација на продажната понуда. Иако оваа компанија има намера да воведе делумна електрификација на своите модели во иднина, сепак не сака да се откаже од моторите со внатрешно согорување.
Додека некои производители на луксузни автомобили, како Porsche и Rolls Royce, веќе на големо работат на нови електрични модели, Maserati останува посветен на конвенционалните бензински мотори.
„Ние сме таков автомобилски бренд на кој му се неопходни моторите со внатрешно согорување, бидејќи нашите модели мораат во себе да ја носат таа сирова емоција“, изјави за MotorTrend шефот на Maserati во САД, Ал Гарднер.
Италијанската компанија во моментот е во криза, поради тоа што продажбата на автомобили од овој бренд е значително намалена во последниот период, и покрај тоа што првпат во нејзината историја таа произведе SUV модел, наречен Levante.
Maserati ќе претстави нови модели на пазарот, кои ќе имаат хибриден погонски систем. Меѓу нив се еден целосно нов спортски автомобил што ќе дебитира на Саемот за автомобили во Женева во 2021 година, а една година подоцна на истиот Саем ќе се појави и новиот SUV, кој ќе биде нешто помал од актуелниот Levante.