Најдобрата кошаркарска лига на Литванија официјално ја прекина сезоната поради корона вирусот.
Литванската кошаркарска лига (ЛКЛ, Lietuvos krepšinio lyga) извести дека сезоната 2019/20 е дефинитивно завршена, а шампион е моментално водечката екипа на Жалгирис.
Вкупно се одиграа 24 кола по кои Жалгирис убедливо води со 22 победи и само 2 пораза. Втор е Ритас со скор од 17-7. До крајот требаше да се играат вкупно 36 кола, а потоа ќе следуваше плеј-оф за шампион.
„Светската здравствена организација прогласи пандемија на светско ниво. Поради виша сила, бордот на ЛКЛ одлучи да стави крај на сезоната 2019/20 во ЛКЛ и да го круниса лидерот во регуларниот дел, Жалгирис од Каунас, за шампион на 27-мата по ред сезона“, стои во соопштението на лигата.
Ова е вкупно 22. титула за Жалгирис кој е најтрофеен клуб во историјата на литванската кошарка. Само Ритас (поранешен Лиетвос Ритас) успевал да ја прекине ноговата доминација и 5 пати се закитувал со титулата.
„Ние како лига очекуваме целосно разбирање и поддршка од навивачите, спортските заедници и нашите партнери. Оваа одлука ќе има огромна долгорочна финансиска последица како по клубовите, така и по лигата. Сепак, здравјето и животот се основни вредности и ЛКЛ донесе најбезбедна одлука за играчите, персоналот и општеството“, завршува официјалното соопштение на ЛКЛ.
