Фудбал
БУНДЕСЛИГА 2019/20

Левандовски ќе биде аут 4 недели поради повреда на коленото

26. февруари 2020 - 18:40 | МИА

Голгетерот на Баерн Минхен, Роберт Левандовски е повреден во левата нога и ќе ги пропушти натпреварите на Баварците во наредните 4 недели, соопшти клубот.

„Роберт Левандовски го повреди левото колено во вчерашната победа од 3:0 над Челси. Ова го покажа денешното истражување на клупскиот доктор д-р Ханс-Вилхелм Милер-Волфарт. После 10-дневна имобилизација на ногата со гипс, ќе започне процесот на закрепнување. Напаѓачот ќе биде надвор од игра за околу четири недели“, рече официјалниот претставник.

Така, Левандовски сигурно ќе пропушти средбите со Хофенхајм, Аугсбург, Унион Берлин и Ајнтрахт од Бундеслигата, судирот со Шалке 04 од германскиот Куп и реваншот со Челси во Лигата на шампионите.

Најверојатно, тој ќе биде подготвен за натпреварите по паузата за национални тимови кон крајот на март.

Тоа е тежок удар за Баерн бидејќи полскиот репрезентативец е водечки играч оваа сезона и во Бундеслигата (25 гола) и во Лигата на шампионите (11 погодоци).