Музика

Лејди Гага објави нова песна, спотот е снимен со iPhone 11 Pro

28. февруари 2020 - 8:56 | А.С.

Поп-ѕвездата Лејди Гага рано утрово го објави најновиот сингл „Stupid Love“ во пакет со видеоспот.

Ова е прва објавена песна на Гага по огромниот успех со саундтракот од филмот „A Star is Born“. Таа доби номинација за Оскар за главната улога филмот (нејзина прва улога во филм), а го освои Оскарот за најдобра оригинална песна таа година за „Shallow“.

Новата песна на Гага во аудиоформат пиратски беше објавена пред три недели и нестрпливите фанови веќе знаеја како звучи, но сега го добија целиот пакет, со видеоспот.

Она по кое се истакнува овој видеоспот на Лејди Гага, за кој беа објавени два тизера на YouTube каналот на пејачката, е што е снимен со iPhone 11 Pro.

Новиот сингл на Лејди Гага е достапен на Apple Music и претставува најава за следниот албум на поп-ѕвездата кој најверојатно ќе биде насловен Chromatica. Тоа ќе биде шести студиски албум на Лејди Гага, а нејзините обожаватели со нетрпение го очекуваат по долгата музичка пауза.