Тренерот на Челси смета дека вечерва неговиот тим ќе игра против еден од главните кандидати за пехарот и се наоѓа пред тешка задача да му застане на патот.
Френк Лампард сезонава првпат како тренер води клуб во Лигата на шампионите. Откако за влакно ја мина групната фаза само бод бегајќи му на Ајакс, сега е пред тежок предизвик бидејќи на „Стемфорд Бриџ“ доаѓа германскиот гигант од Минхен.
„Ова е битка во две фази. Концентрацијата и фокусот мора да бидат на највисоко ниво во двата натпревара. Сакам да преземаме повеќе ризик во нападот, но така што нашата дефанзива ќе биде подготвена и на готовс“, вели Лампард.
Најголема закана по голот на неговиот тим, според него, е полскиот голгетер Роберт Левандовски.
„Левандовски е конзистентен со години. Неговата статистика на голови, гледајќи го од страна сѐ на него е светска класа. Имам гледано доста од Баерн и токму тој се истакнува. Тој е врвот на копјето, но имаа и други играчи кои претставуваат закана. Нашата игра мора да оди нагоре во нокаут фазата. Нашата игра мора да оди нагоре каде и да играме“.
Поранешниот играч вели дека Баерн е еден од кандидатите за освојување на пехарот на крајот од мај во Истанбул. Во 2012, кога Лампард беше капитен на Челси, триумфираше во ова натпреварување токму над Баерн и тоа среде Минхен, на пенали.
„Да, секако дека Баерн може да ја освои Лигата на шампиони. Имаат талент и играат како еден, не бадијала се први во Бундеслигата. Тоа е клуб кој ги надминува потешкотиите поради својата силина и структура. Имам огромна почит за нив. Тие секоја година можат да ја освојуваат Лигата на шампионите, но нашата работа е да се обидеме да ги спречиме“.
Натпреварот се игра вечерва од 21 часот, а правдата ќе ја дели францускииот арбитар Клемен Тјурпен.
