На човечкиот организам дневно му се потребни осум чашки вода, но тоа правило не важи за секого, пренесуваат научници од Австралија.
Експерти препорачуваат луѓето да го „слушаат“ сопствениот организам и дека тоа е најдобриот начин да се утврди кога е внесена доволна количина на вода во текот на денот.
Научници од Универзитет во Австралија заклучиле дека на луѓето, во моментот кога организмот е заситен со течности, им е тешко да голтаат вода.
Потребно е да се прави она што го бара организмот – се пие вода кога човек е жеден, а не по утврден распоред, препорачуваат научниците.
Во текот на истражувањето, испитаниците пиеле вода во две ситуации – после напорни вежби, кога биле жедни, и потоа, кога морале да пијат вода „на сила’.
Во вториот случај морале да вложат три пати повеќе напор за да ја испијат зададената количина на вода, што претставувало јасен знак дека телото ја регулира претераната консумација, на тој начин што физички ја отежнува.
Научниците предупредуваат дека премногу вода може да биде погубно за организмот.
Прекумерното внесување на течности може да доведе до хипонатремија, односно оток на клетките на телото, што доведува до грчеви, гадење, повраќање, губење на свеста и во екстремни случаи дури и до смрт.
