Збирката песни „Црни дупки во нас“ на Марта Маркоска беше објавена во препев на Рајко Лукач на српски јазик, преку издавачката куќа „Граматик“ од Белград.
За книгата „Црне рупе у нама“ утре, 26 декември, 2017 година, ќе се одржи книжевна работилница, во 19:30 часот во „Јавна соба“. На настанот во соработка со Културно-информативниот центар на Србите во Скопје СПОНА, за, препевот, за содржината и за авторката Маркоска, ќе зборуваат Александра Спасеска и Мите Стефоски, под модераторство на Милутин Станчиќ.
Авторката го посветува овој настан на нејзиниот неодамна починат татко, сатиричарот и драматург Иван Карадак.
„Поцинично, поиронично и посаркастично не можеше да биде. Баш како Карадак да го пишувал сценариото за текот на претстојниве настани. Пред само три недели објавив дека сакам да го затворам космичкиот циклус што ги запиша Црните дупки на мапата на моето постоење, кога животот, поигрувајќи се, отвори нова Црна дупка и ме фрли во ново неизвесно патување низ време-просторот. Овој настан го продолжувам во чест на татко ми, Иван Карадак (1946-2017), неговите живот и дело, заради љубовта и грижата што ми ги пружи и заради кого станав личноста која сум сега.
Карадак требаше да биде присутен на претставувањето на ЦРНЕ РУПЕ У НАМА. Знам дека немо ќе нѐ набљудуваш како што тоа го правеше и додека беше жив. Да се напиеме по една во чест на Карадак и да му го осветлиме патот кон новите димензии на постоењето - со песна“, вели Маркоска во најавата за настанот.
На книжевната работилница, присутните ќе може да ја купат книгата „Црне рупе у нама“ по цена од 150 денари, а настанот добива и хуманитарна димензија, со тоа што собраните средства од продажбата на книгата ќе бидат донирани за подарок пакетчиња за деца од социјално загрозени семејства, преку „Подари радост“.
За авторката:
Марта Маркоска е родена на 29.06.1981 година, во Скопје. Дипломирала на Катедрата за Општа и компаративна книжевност, на филолошкиот факултет „Блаже Конески“ во Скопје, а магистрирала на Интердисциплинираните Културолошки студии во книжевноста, при Институтот за македонска литература во Скопје. Маркоска е член на Друштвото на писателите на Македонија и досега има единаесет (11) авторски објави, меѓу кои „Фил(м)увани приказ(н)и“ (научни студии и есеи за филмот и кинематографијата, 2017), „Култура и меморија“ (културолошки студии, 2014), „Расправа за Зен будизмот (религиско-филозофски трансценденции помеѓу источната и западната мисла“, (научна студија, 2013), „Стрмоглаво кон височините“ (поезија), „Вител во Витлеем“ (раскази, 2010) и други.
