Австралискиот тенисер Ник Кирјос е казнет со 16 недели суспензија и казна од 25.000 долари поради „влошено однесување“, по истрагата на АТП. Организацијата соопшти дека Кирјос ќе биде под условна казна во траење од 6 месеци, период во кој не смее да повтори ниту еден прекршок од досега направените.
Контроверзниот тенисер со грчко потекло по казната од 113.000 долари поради напад на судија на Мастерсот во Синсинати, продолжи со испади и ги обвини организаторите на УС Опен дека се корумпирани.
„Истрагата што ја водеше потпретседателот Гејл Бредшо заклучи дека Кирјос има влошено однесување во законикот на АТП“, се наведува во соопштението.
Кирјос во следните 6 месеци не смее да направи ниту еден прекршок, не смее вербално да навреди ниту едно официјални лице на мечеви, навивачи ниту која било личност додека се наоѓа на терен.
Условната ќе ја прекрши ако стори каков било неспортски гест, како плукање во правец на судијата, што веќе го има правено. Прекршок ќе направи и ако со мимика или друго движење на телото упати закана или навреда на кој било на теренот и покрај него.
Ќе мора да користи услуги од официјален АТП психолог, а во текот на паузите во ноември и декември ќе биде ангажиран во работа со стручни лица.