Клубот Манчестер Сити го ангажира адвокатот кој двапати успешно го блокираше Брегзит и чии услуги чинат 23.000 евра на ден, за да ја оспори одлуката на УЕФА за двегодишно исфрлање од Европа за кршење на правилата на финансискиот фер плеј.
Дејвид Паник се смета за еден од најдобрите адвокати во Велика Британија, а клубот верува дека токму тој ќе помогне да се оспори одлуката на УЕФА, пишуваат британските медиуми.
Паник во два наврата ја застапуваше активистката Џина Милер во случаи поврзани со Брегзит. Во 2016 година успеа да ја спречи тогашната британска премиерка Тереза Меј да донесе одлука за излез на Велика Британија од ЕУ без согласност од Парламентот.
Сопствениците на Сити се надеваат дека Паник е човекот кој ќе може да ја сврти ситуацијата во нивна корист по казната од УЕФА, а според британските медиуми тоа ќе ги чини 23.000 долари дневно.
Манчестер Сити беше казнет со две години забрана за играње на натпреварувања на УЕФА поради кршење на финансискиот фер плеј, а „граѓаните“ ќе мора да платат и 30 милиони евра парична казна. Сити најави и дека ќе се жали кај Меѓународниот суд за спортска арбитража во Лозана.
Од 2008 година, клубот е во сопственост на шеикот Мансур од Обединетите Арапски Емирати чие богатство се проценува на 30 милијарди долари, а од 2015 година 13,79% од клубот се во сопственост на City Football Group.