Криминалните организации во Италија делат прехранбени производи на најсиромашните за да ги привлечат во време на пандемијата со COVID-19, предупредува новинарот Роберто Савијано.
Тој тврди дека овие организации исто така помагаат во одобрувањето позајмици без камата од лихвари.
Мафијашките групи сакаат да се инфилтрираат во некои бизниси кои сега се соочуваат со потешкотии и чекаат европска финансиска помош, вели Савијано, автор на книгата „Гомора“ за неаполската мафија Камора.
„Мафијата само чека некаква криза“, а компаниите во неволја ќе бидат жртвите, бидејќи ќе влезат во бизнис со партнери кои се поврзани со овие криминални организации, тврди тој.
„И вие станувате партнер бидејќи сте влегле во бизнис со нив. Ова не е ситуација во која некој ви доаѓа со пиштол, туку мафијата доаѓа во форма на финансиски советници кои ви нудат помош“, додава Савијано.
Според неговите сознанија, ако Европа не интервенира, на неконтролиран начин ќе се зголеми количината на пари со која располагаат мафијашките организации , а сега се наоѓа во Германија, Франција, Шпанија и Белгија.
Покрај тоа што им даваат храна на најсиромашните во Неапол, лихварите на барање на Камора ги укинале каматите за позајмување пари.
„Зошто? За да добијат нешто за возврат“, тврди Савијано кој сега живее во Њујорк и имаше полициска заштита по издавањето на книгата во 2006 година бидејќи имаше бројни закани по неговиот живот.