Филм & ТВ

Како Александра го извлече Кијану Ривс од „неговиот мрак“?

11. ноември 2019 - 13:53 | А.С.

Блиски луѓе на актерот Кијану Ривс велат дека неговата девојка Александра Грант не само што „му го украде срцето“, туку и „го извлече од неговиот мрак“.

Популарниот и обожаван актер ретко ја покажувал неговата приватна емотивна страна во јавност во текот на неговата 35-годишна кариера.

Минатиот викенд конечно се појави на настан со девојката и ја држеше за рака – Ривс (55) дојде на свеченоста LACMA Art + Film Gala Presented By Gucci во Лос Анџелес со уметницата Александра Грант (46).

Симпатични и ненападни, двајцата срамежливо позираа за фотографите на кои не им се веруваше дека ја имаат приликата да го фотографираат Ривс официјално во двојка.

Кијану и Александра се познаваат од 2011 година, кога соработуваа на двете книги поезија на актерот за кои таа ги направи илустрациите – „Ode to Happiness“ и „Shadows“.

Двајцата исто така работеа на проектот X Artists’ Books во 2017 година.

Заедничкото појавување на црвениот тепих ги потврди гласините дека Кијану официјално има девојка, откако минатиот месец беа видени како влегуваат во суши бар во Западен Холивуд фатени под рака.

Актерот претходно бил поврзуван со Аманда де Каденет, Сандра Булок, Клер Форлани и Софија Копола, но никогаш јавно не се произнесе по прашањето дали е во врска.

Сега неговите блиски луѓе велат дека е „многу среќен“ со Александра која му помогнала да ја преболи загубата на поранешната девојка Џенифер Сајм и нивната ќерка.

Во 90-тите Кијану се забавуваше со Сајм. Двојката доживеа тешка траума – нивната ќерка Ава беше мртвородена еден месец порано од терминот.

Оваа траума беше премногу тешка за Сајм и во 2001 година таа удри со нејзиниот Jeep Grand Cherokee во паркирани автомобили и почина на самото место. Имаше само 28 години.

Токму Александра била таа која успеала после долго време да го убеди Кијану да разговара за неговите емоции и да се соочи со минатото.

„Многу долго време беше во неговиот мрак, но позитивниот став на Александра и нејзината поддршка играа огромна улога во тоа како тој си го смени животот од корен“, вели пријател на актерот.