Емоционалната церемонија во која учествуваше кошаркарот на Бостон Селтикс, Кајри Ирвинг, беше организирана од племето Сијукси од Стендинг Рок. Ирвинг го доби индијанското име „Мала Планина“ и сега официјално е дел од ова старо американско племе.
За време на церемонијата Кајри Ирвинг носеше традиционална племенска кошула и стоеше на кожа од бафало, додека старешината на племето, Вернон Железен Коњ, се молеше над него.
Група од племенски тапанари свиреа и се молеа, а за целото тоа време Кајри Ирвинг беше завиткан во ќебе, имаше орелски пердув во косата заедно со медицинска топка направена од боцки од еж и на главата носеше медаљон за да може да го „прими“ неговото ново индијанско име.
Постарата сестра на Кајри Ирвинг, Ејжа, исто така беше дел од церемонијата. Таа го доби името „Бафало Жена“ и беше примена како дел од племето заедно со нејзиниот брат.
„Горди сме што примаме двајца наши членови во племето. Ова дефинитивно е историски момент“, изјави претседателот на Стендинг Рок, Мајк Фејт.
Предците на мајката на Ирвинг, Елизабет Ларсон, имаат потекло од племето Сијукси – Стендинг Рок, но таа беше посвоена од друго семејство уште кога беше дете. Мајката на Кајри Ирвинг почина кога тој имаше само 4 години, па затоа тој до скоро не знаеше многу за неговото индијанско потекло.
