Фиорентина имаше најтешка задача елиминирајќи го минатогодишниот финалист Аталанта, додека Милан и Јувентус немаа проблеми со СПАЛ и Удинезе.
Откако лани загуби од Лацио во финалето, екипата на Аталанта сепак и оваа година ќе почека за трофејот кој го брка од далечната 1963 кога прв и единствен пат го освои.
На „Артемио Франки“ во Фиренца славеше домашната Фиоирентина победувајќи со 2:1 и изборувајќи дуел со Интер во четвртфиналето. Новото засилување Патрик Кутроне уште во 11-тата минута го отвори резултатот, но „Деа“ израмни во 67-мата преку Јосип Иличиќ. Ерупција на стадионот предизвика голот на Пол Лирола на шест минути до крајот.
Милан беше убедлив против СПАЛ славејќи лесна победа од 3:0. Кжиштоф Пјонтек во 20-тата, Сами Кастиљехо во 44-тата и Тео Ернандес во 66-тата стрелаа во мрежата на Етрит Бериша.
Вечерта со стил ја затвори Јувентус кој немаше ни најмал проблем со Удинезе за кој 90 минути во нападот одигра нашиот Илија Несторовски. Гонсало Игуаин го отвори резултатот во 16-тата минута, потоа следуваа два гола на Пауло Дибала во 26-тата и 58-мата минута од кој првиот од белата точка, а натпреварот го затвори Доуглас Коста во 61-вата исто така од пенал.
Со оглед на тоа што остана уште еден натпревар кој се игра вечерва и во кој Парма ја пречекува Рома на „Енио Тардини“ од 21.15 часот, досега комплетирани се три четвртфинални двојки. Сите натпревари од четвртфиналето се играат на крајот од овој месец.
Четвртфинале:
(21-ви) Наполи - Лацио
(22-ри) Јувентус - Парма/Рома
(28-ми) Милан - Торино
(29-ти) Интер - Фиорентина