Фудбал
ЈАНУАРСКИ ТРАНСФЕРИ 2020

Јувентус и ПСЖ преговараат за размена за Емре Џан и Паредес

14. декември 2019 - 10:16 | МИА

Јувентус и Пари Сен Жермен подготвуваат размена на фудбалери во јануарскиот преоден рок.

Tuttosport откри дека „бјанконерите“ се подготвени да го пуштат Емре Џан во Париз и да го доведат Леандро Паредес во своите редови.

И двајцата играчи се согласиле на договорот.

Јуве има проблеми во средниот ред од почетокот на сезоната, главно поради повредите на Сами Кедира, Арон Ремзи и Блас Матуиди.

И покрај неговиот ограничен избор, Маурицио Сари воопшто не се потпира на Џан, оставајќи го надвор од составот на Лигата на шампионите.

Самиот фудбалер не го криеше незадоволството од овој факт и го искажа јавно.

Паредес може да биде добро решение за гигантот од Торино. Тој има искуство во Серија „А“ од својот период во Рома, а потоа играше многу силно со тимот на Зенит пред да се пресели во ПСЖ. Аргентинецот е одобрен од спортскиот директор на Јувентус, Фабио Паратичи.

Што се однесува до Емре Џан, трансферот во францускиот хегемон би бил одличен излез од ситуацијата за него. За Германецот се заинтересирани и Борусија Дортмунд и Фиорентина, но неговата желба е да им се придружи на Нејмар и компанија.