Играч на третолигашот Пјанезе е првиот фудбалер заразен со корона вирусот кој во Европа најголем замав зема токму во Италија.
Фудбалерот, чие име не е обелоденето, се разболел во саботата и наредниот ден не играл на гостувањето кај Јувентус У23 кој неговиот тим го загуби со 1:0. Но, играчот претходно тренирал со соиграчите, а присуствувал и на тимскиот ручек. Ноќеска бил тестиран за Covid-19, а резултатите покажале дека е позитивен.
Денеска играчот бил пренесен во поликлиниката Ле Скоте во Сиена каде ќе биде лекуван, додека тренингот на тимот е откажан поради мерки на претпазливост. Состојбата му е стабилна и играчот ќе оздрави целосно, но проблемот е дали и некој друг се заразил од него.
Пјанезе е од малото гратче Пјанкастањајо кое брои 4.200 жители и се наоѓа во јужниот дел на Тоскана. Се натпреварува во Серија Чи група А каде моментално е претпоследен. Заразениот играч е од соседното гратче Абадија Сан Салваторе.