Заминувањата на Един Џеко и Ромелу Лукаку го оставија Интер со преполовен напад, а челниците на клубот решение најдоа во нивниот поранешен играч - Австриецот Марко Арнаутовиќ.
Медиумите од Италија велат дека Интер ќе ѝ плати на Болоња 10 милиони евра за да го потпише Арнаутовиќ. Се очекува фудбалерот наскоро да ги помине задолжителните медицински тестови, по што и ќе стави потпис на договорот, чии услови веќе ги има договорено.
Арнаутовиќ не е непознат за Интер бидејќи беше дел од тимот на Жозе Мурињо кога освоија тројна титула, вклучувајќи ја и Лигата на шампиони. Тогаш настапуваше како позајмен од холандски Твенте, но запиша само 3 настапи, сите во Серија А.
Во меѓувреме одигра три сезони за Вердер, четири за Стоук, две за Вест Хем, па имаше двегодишна авантура во кинеската лига играјќи за Шанхаи Порт пред летото 2021 година да се врати во Серија А во дресот на Болоња. Лани на 21 натпревар во Серија А постигна 10 голови и еднаш асистираше.
Репрезентативец е на Австрија за која има одиграно 108 натпревари и постигнато 34 голови. Дете е од мешан брак: татко му е Србин, а мајка му Австријка.
