Францускиот репрезентативец и ѕвезда на Манчестер Јунајтед, Пол Погба, им одржа инспиративен говор на соиграчите, пред натпреварот во осмина финалето од Светското првенство со Аргентина, па на тој начин покажа дека може да биде лидер и надвор од терените.
„Сакам да видам војници на теренот. Не сакам да одам дома. Ќе завршиме среќни! Сакам вечерва да одам на забава. Сакам да бидеме мртви на теренот, сите заедно! Сакам мажи, работници, војници. Денеска ќе ги „убиеме“. Меси, не Меси, не ме интересира. Дојдовме да го освоиме Светското првенство“, рече Погба, а снимката е земена од документарец кој го прикажа TF1.
За потсетување, во еден од најинтересните мечеви на изминатово Светско првенство, Франција ја доби Аргентина со резултат од 4:3, а потоа падна и Уругвај, пред чиј меч Погба исто така блескаше во соблекувалната.
„Тоа е тоа. Ќе продолжиме јако, одиме до крај. Се гледаме на 15 јули, сите заедно. Денеска Матуиди поради суспензија е разочаран, изнервиран. Сака да игра повеќе од кој било. За момците како него, денеска мораме да се бориме. Нема да биде на теренот, но исто како да е со нас. Сите мораме да имаме најдобро издание“, зборуваше Погба.
Пол Погба на претходното Светско првенство е прогласен за најдобриот млад играч на турнирот, награда која сега му припадна на сонародникот Мбапе, а и на овој Мундијал, фудбалерот на Јунајтед ги покажа своите лидерски способности.
Како што велат и неговите играчи од репрезентацијата, Погба полека но сигурно станува лидер на оваа Франција, на теренот, а како што гледаме и надвор од него.
Франција, во следната рунда во полуфиналето ја доби Белгија со 1:0, а потоа во големото финале и Хрватска со 4:2 и стана првак на светот.
