Шпанија се доближува до надминување на најлошото во епидемијата на коронавирусот, охрабрува премиерот, додека Парламентот дебатира дали да се продолжи вонредната состојба во земјата.
„Го контролираме пожарот“, изјави премиерот Педро Санчез во Мадрид и додаде дека земјата ќе извојува „целосна победа“ над вирусот.
Шпанија има најголем број на потврдени пациенти со COVID-19 во Европа – 152.446. Заклучно со денеска, во земјата се регистрирани 15.238 смртни случаи како последица на оваа болест.
Парламентот уште дебатира дали да се продолжи вонредната состојба во земјата до 26 април, што значи дека луѓето ќе бидат затворени во нивните домови уште две недели. Очекувањата генерално се дека мерката ќе биде продолжена.
Шпанија има воведено некои од најстрогите мерки во Европа, но премиерот тврди дека забраните за движење помогнале за драстично намалување на бројот на новозаразени.
Санчез е најновиот во низата лидери кои укажуваат дека ситуацијата се ближи кон стабилизирање.
Неколку европски земји размислуваат за олабавување на рестрикциите од следната недела, додека расте загриженоста колкави ќе бидат економските последици од изолациите и карантините што ги воведоа земјите.
Иако од завчера до вчера одржуваа маратонски преговори, ЕУ лидерите не се договорија какви чекори точно ќе се преземат во насока на економски пакети за помош.
Министрите за економија во 17 часот по локално време во Брисел почнаа телеконференција на која ќе разговараат за планови за помош.
