Harley-Davidson се повлекува од Индија, најголемиот пазар за мотоцикли во светот.
Легендарниот американски мото-бренд прекина многу производствени погони и ги намалува продажните операции. Одлуката на Harley следи неколку недели откако Toyota соопшти дека нема да се шири повеќе во Индија поради високите даноци во земјата.
Повлекувањето на гигантите е силен удар за индискиот премиер Нарендра Моди кој се мачи да привлече или задржи странски производители во земјата.
Заминувањето на Harley значи трошок од 75 милиони долари за реструктурирање и затворање на фабриката во Бавал, северна Индија. Оваа фабрика беше отворена во 2011 година, но Harley-Davidson се соочи со сериозна конкуренција од локалниот бренд Hero, како и од јапонска Honda.
Во Индија се продаваат околу 17 милиони мотоцикли и скутери годишно.
Иако е поевтина од многу други земји во развој, Индија се покажа како тежок пазар за пробивање на странски автопроизводители. General Motors се повлече од земјата во 2017 година, а Ford лани се согласи да префрли голем дел од својата работа таму во заеднички потфат со индискиот мото-гигант Mahindra & Mahindra.
И американскиот претседател Доналд Трамп се има пожалено за високите даноци во Индија, особено оданочувањата за мотоциклите Harley-Davidson.
Увозните тарифи во Индија беа намалени за 50%, но брендот сепак маки мачеше на конкурентниот пазар. Harley исто така се соочува и со генерални проблеми и за периодот април-јуни годинава ја забележа првата квартална загуба по повеќе од една деценија.
