Чудната форма на Ultima Thule, астероидот што се наоѓа на 1,6 милијарди километри оддалеченост од Плутон и кој вселенското летало на НАСА New Horizons го одмина на 1 јануари годинава, стана најинтересната тема за разговор на ентузијастите и познавачите на вселенската наука.
Гиф видеото што го објави НАСА, а на Twitter го сподели Лабораторијата за применета физика при универзитетот „Џонс Хопкинс“ (што учествуваше во создавањето на леталото за мисијата New Horizons), покажува како изгледа ротацијата на Ultima Thule, откако уредот Long Range Reconnaissance Imager (LORRI) поставен на леталото направи фотографии од астероидот кога прелета покрај него.
Во соопштението на НАСА се објаснува дека New Horizons поминало на само 28.000 од астероидот и се додава дека снимките биле изострени и зголемени за да се доловат деталите.
„Ротацијата на Ultima Thule трае околу 16 часа., така што гиф видеото опфаќа околу половина ротација“, вели НАСА.
Научниците сега ќе ги искористат овие снимки за да одредат каква е точно тридимензионалната форма на Ultima Thule, за да може полесно да ја проучат неговата природа и потекло.
New Horizons на 1 јануари прелета покрај астероидот 2014 MU69 Ultima Thule, кој се наоѓа на работ на нашиот Сончев Систем, на околу 6,5 милијарди километри од Сонцето.
Астероидот прв пат беше забележан со телескопот Хабл во 2014 година.
НАСА му даде име Ultima Thule што значи „Работ на светот“, во март, 2018 година.
Астрономите велат дека прелетувањето покрај астероидот ќе им дадат на научниците важни сознанија за тоа како се формирале планетите, месечините и други тела во Сончевиот Систем.
Корисниците на социјалните мрежи се позабавуваа со гифот и даваа коментари за формата на астероидот што се далеку од научни – дека личи на снешко, на компир, па дури и „вселенски кикирики“, но исто така возбудено прашуваа кога ќе има нови снимки.
НАСА вели дека ќе треба да поминат 20-тина месеци за да се префрлат до Земјата сите снимки и податоци од далечниот астероид што некои астрономи веќе почнаа да го викаат нагалено „вселенски снешко“.
Астероидот е со големина на градот Њујорк и орбитира во областа на Сончевиот Систем позната како Појасот Кипер. Ова е регион во вселената после орбитата на Нептун и се состои од неколку замрзнати објекти за кои се смета дека се остатоци од раѓањето на Сончевиот Систем пред 4,5 милијарди години.
Објектите во Појасот Кипер се екстремно ладни, -238,15 степени Целзиусови. Поради нивната ниска температура не можат да се менуваат внатрешно, ни надворешно и се скаменети во времето со милијарди години.
„Никогаш не сме допреле до нешто што било замрнато толку долго време, нешто толку совршено зачувано од првите денови од постоењето на Сончевиот Систем“, вели Алан Стерн, главен истражувач на мисијата New Horizons.
