„Дали модата може да ја спаси планетата Земја? Еволуираме преку зголемување на свеста.“ Вака организацијата Fashion Revolution Macedonia го најави настанот на кој ќе има проекција на документарецот River Blue.
Во рамките на нивниот план на активности за оваа година, Fashion Revolution Macedonia ќе одржи настан на кој ќе се прикаже документарецот River Blue во просториите на Europe House во Скопје, на 23 јануари (четврток) во 17 часот.
RiverBlue (2016) е документарен филм, кој го прикажува тригодишното патување на Марк Анџело, по реките во светот, каде тој ги евидентира непосакуваните влијанија на модната индустрија врз животната средина. Филмот го истражува загадувањето на реките и токсичните ефекти од изработката на текстилни материјали (тексасот во фокус). Зборува за последиците за човештвото, но и за решенијата кои даваат надеж за одржлива иднина.
RiverBlue има за цел да ја зголеми јавната свест за овој проблем и да придонесе кон тоа модата да функционира врз етички и одржливи принципи. Филмот е апел за значајни промени од страна на најпознатите модни брендови да внимаваат и да бидат посвесни за начинот на кој се изработува облеката која ја носиме.
„Придружете ни се во нашата модна (р)еволуција! Да го почнеме заедничкото движење кон совесна мода оваа година со добар филм и пуканки“, порачуваат од Fashion Revolution Macedonia.
Влезот е бесплатен, но местата се ограничени, па заинтересираните може да си резервираат место на настанот креиран на Facebook.
