Некогаш најдобар играч во македонската лига, лидер и миленик на Вардар, сега се врати во татковината за да игра во четвртолигаш.
Откако го раскина договорот со Шкендија после неуспешната авантура, Хуан Фелипе е назад во Бразил. Ќе игра за тимот на Бангу, екипа која во новата сезона 2020 ќе игра во Серија Џи, четврта по ранг лига. Последен пат во татковината играше во 2014 година кога тоа лето премина во софиска ЦСКА од каде пак дојде во Вардар. Двапати стана шампион на Македонија, еднаш триумфираше во Суперкупот, а беше дел од златната генерација која играше во групите од Лига Европа и воедно го постигна првиот гол за Вардар во оваа фаза во второто коло на гости кај Розенборг во поразот од 3:1.
Во Бангу го најавуваат како големо засилување, велат дека им дошол „идолот на Македонија“. И Шкендија слично го најави, па разочара. Но, ова е четврта лига, шанса 32-годишниот офанзивец да си ја поврати старата препознатлива форма.
„Убаво е што сум назад во Бразил после толку долго време. Се надевам дека што побрзо ќе се адаптирам и ќе му помогнам на Бангу да ја оствари целта, да се бори за врвот на табелата. Навивачите од мене нека да очекуваат одлучност и волја за победи. Мотивиран сум, среќен и многу самоуверен“, изјави Фелипе.
Бангу не бил секогаш нисколигаш. Порано бил познат клуб, а најпознатите играчи кои настапувале таму се Зозиму и Зизињу. Првиот дефанзивец од генерацијата на Пеле, шампион со Бразил од Мундијалите во 1958 и 1962, додека вториот офанзивец, член на онаа генерација на Бразил која загуби дома во финалето од Мундијалот во 1950 од Уругвај. ФИФА го има прогласено за најдобар играч на тоа првенство.