Откако вчера беше потврден првиот случај на корона вирус Covid-19 во Македонија, а и поради фактот дека расте бројот на заболени низ Европа, меѓу граѓаните почна да владее загриженост, но простор за паника нема.
Д-р Жарко Караџовски од Институтот за јавно здравје уверува дека едно позитивно лице не претставува ризик за населението. Според Караџовски, граѓаните може да бидат мирни. Медицинските служби се дежурни 24/7 и способни за само половина час да направат соодветна екипа која би реагирала веднаш.
Според досегашните медицински истражувања и болнички статистики, може да се констатираат следните факти:
* Кај 81% од заразените со корона вирусот Covid-19 станува збор за блага форма на болеста, кај 14% од заболените има сериозни последици, а кај 5% предизвикува критична состојба.
* Општата смртност од корона вирусот е помалку од 2%.
* Највисока стапка на смртност е забележана кај луѓе постари од 80 години (8%), додека кај помладите од 39 години изнесува само 0,2%.
* Болеста ретко ги погодува децата. Тоа го докажуваат статистичките податоци дека помалку од 3% од заболените се помлади од 15 години.
* Нема пријавени смртни случаи кај пациенти со корона вирус имале блага или сериозна форма на болеста.
* Стапката на смртност изнесува 49% кај критичните случаи, а се зголемува кај оние кои веќе боледувале од друго сериозно заболување, како болест на срцето, дијабетес, болест на дишните патишта, рак и слично.
* Може да се биде болен и заразен, без симптоми. Инкубацијата на вирусот се смета дека трае 14 дена.
Факти и митови за корона вирусот
Во време кога епидемијата на болеста е во ек, на социјалните мрежи, но и во медиумите кружат најразлични дезинформации кои може да предизвикаат паника и непотребна загриженост во врска со овој корона вирус.
Токму затоа со вас ги споделуваме овие пет најчести митови за новиот корона вирус, како и фактите во врска со нив.
МИТ: Корона вирусот е најопасниот вирус што постои.
ФАКТ: Годишно, обичниот грип убива 60 пати повеќе луѓе отколку корона вирусот.
МИТ: Ако ми е дијагностицирана инфекција со корона вирусот, ќе умрам.
ФАКТ: Од сите случаи на заразени, починатите пациенти најчесто имале послаб имунитет на организмот, веќе имале и други болести или биле повозрасни пациенти.
МИТ: За да бидам заштитен/а, треба да набавам заштитно одело (налик скафандер) и маска N95.
ФАКТ: Најдобрата заштита е редовното миење раце. Исто така препорачливо е да се кива и кашла „во лакт“, а не во дланка.
МИТ: За оваа ситуација треба да се паничи и недвосмислено да се обвинува Кина. Исто така, би требало да правиме нечувствителни шеги за и кон меѓународните студенти, или за и кон туристите од Азија.
ФАКТ: Расизмот и ксенофобијата, а не доказите и практичното искуство, се тие кои ги распламтуваат паниката и хистеријата кои се случуваат. Нема оправдување за да се биде груб кон некого.
МИТ: Треба да верувам во сè што читам за корона вирусот на интернет, затоа што сè е фактографски проверено и е напишано без каква и да е субјективност.
ФАКТ: Погрешната информација (дезинформацијата) и расизмот се поопасни од кој било вирус. Затоа, наместо идеолошки, барајте текстови кои се базирани на докази и факти и кои не се само од еден извор за информирање.