Facebook има проблем - вишок од 52 милијарди долари.
Иако има повеќе пари од сите американски фирми заедно (со исклучок на неколку), Вашингтон толку е „наострен“ на лидерот во сегментот на социјалните мрежи, што ова може да претставува проблем во напорите за големи аквизации на компанијата, стои во анализата на CNN.
За финансискиот директор Дејвид Венер и основачот на Facebook Марк Закерберг, оваа количина на пари во кеш претставува фасцинантен проблем.
Facebook не исплаќа дивиденти на акционерите, но дури и со додавање дивиденда од 2 отсто би се потрошиле „само“ 11 милијарди долари годишно.
Во меѓувреме, Facebook го намали темпото на откуп на свои акции оваа година, откако на тоа потроши повеќе од 11 милијарди долари во 2018 година кога акциите паднаа дури до 124 долари. Моментно цената им е 200 долари.
Нивото на капитални инвестиции на компанијата би требало да остане непроменето и следните години, се вели во извештајот за третиот квартал.
„Постојат реални политички ограничувања за тоа што можат тие да направат“, вели Саманта Маклимор, портфолио менаџер во Miller Value Partners во Балтимор, фирма што поседува 387.000 акции на Facebook, основана од познатиот инвеститор Бил Милер.
„Големите технолошки компании дозволиле неконтролирано да трупаат готовина“, додава таа.
„Политичките проблеми на Facebook ја намалуваат веројатноста дека таа готовина ќе ја искористат за некоја голема аквизиција“, смета Џон Фримен, аналитичар во CFRA Research.
Сенаторите Берни Сандерс и Елизабет Ворен го критикуваат потегот на Facebook да ги купи Instagram и WhatsApp и изнесоа тврдења дека администрациите на Обама и на Трамп дозволиле големите технолошки компании да станат исклучително моќни благодарение на недостигот од антимонополски закони.