Големиот пожар што избувна денеска во близина стадионот „Сент Мери“ го откажа вечерашниот дуел меѓу Саутемптон и Престон во Чемпионшип, а причината за овој страшен инцидент сѐ уште е непозната.
На само неколку часа пред важниот натпревар меѓу Саутемптон и Престон на „Сент Мери“ на југот на Англија, избувна пожар. Се запали фабрика во близина на стадионот, а бидејќи беше ден на натпревар, на стадионот имаше голем број луѓе.
Сите беа брзо евакуирани, а подоцна беше потврдено дека натпреварот е одложен. Целиот стадион беше покриен со густ црн облак од чад откако пламените јазици ја зафатија целата фабрика.
На социјалните мрежи се појавија драматични снимки од пожарникарите кои се борат со пламените јазици. На луѓето што живеат во областа им се советуваше да ги држат затворени прозорците и вратите поради количината на чад.
Блиските патишта беа затворени, а Саутемптон на својата официјална веб-страница објави дека натпреварот е одложен.
„Инцидентот предизвика значителен прекин во областа, а патиштата околу стадионот сѐ уште се затворени, додека противпожарните екипи продолжуваат да се справуваат со ситуацијата“, се вели на официјалната веб-страница на клубот домаќин, објавена нешто по 16 часот.
Инаку, на „Сент Мери“ вечерва требаше да се одигра натпревар во кој Саутемптон го фаќа последниот воз за директен пласман во Премиер лигата бидејќи Ипсвич на втората позиција му побегна на 8 бода. Доколку Саутемптон не победи, тешко дека ќе има шанса сето тоа да го постигне до крајот на сезоната.
„Сент Мери“ на македонската јавност ѝ е добро познат и поради тоа што во 2002 година Македонија таму играше квалификациски натпревар за пласман на ЕУРО 2004 протоив Англија. Возбудливиот натпревар заврши 2:2, а Артим Шаќири стана легенда постигнувајќи гол од корнер против Дејвид Симан.
